'Shqipëria pasuri për Europianin'! E ardhmja pezull, Igli Tare: Do takohem me Pep Guardiolën te City

Igli Tare është një i papunë luksi, me ish-drejtorin e Lazios që u largua nga klubi i Serie A pas më shumë se një dekade si drejtor sportiv, aty ku krijoi një emër të mirë në zyra.

Për "Kicker" në Gjermani, Tare bën me dije se ende nuk e ka vendosur të ardhmen, por kërkon një klub që të ketë ambicie për sukses me një akademi të mirë.

Përveç pushimeve të gjata, Igli tregon se ka udhëtuar në shumë stadiume për të parë nga pranë shumë ndeshje, kjo edhe në Greqi apo Turqi. Ish-sulmuesi i Kombëtares tregon se së shpejti do bëjë një vizitë në Premier League, ku do takojë mikun e tij të vjetër, Pep Guardiolën e Man. Cityt apo edhe Roberto De Zerbin e Brighton.

"Unë ende jam me takime. Së shpejti do të vizitoj Pep Guardiolën te Man. City dhe Roberto de Zerbin e Brighton. Unë jam shumë i emocionuar për të ndarë njohuri me ta", tha Tare.

Për të ardhmen dhe një klub të mundshëm, Tare tha se kërkon diçka me ambicie, ndërsa fjalët se në 2021 ishte pranë Eintracht Franfkurt në Bundesligë ishin thashetheme.

"Një klub duhet të ketë ambicie të larta dhe të dëshirojë të konkurrojë për vende ndërkombëtare nëse është e mundur. Por është po aq e rëndësishme për mua që t'i arrij këto synime në një mënyrë të qëndrueshme dhe të qëndrueshme ekonomikisht. Blerja e lojtarëve relativisht lirë dhe më pas shitja e tyre përsëri pas një kohe me çmime dukshëm më të larta ka qenë forca e madhe lëvizëse dhe baza e zhvillimit tonë të vazhdueshëm te Lazio ndër vite", vijoi shqiptari.

Sa i takon Europiani në Gjermani, Igli shtoi se tifozët shqiptarë do jenë një pasuri së bashku me ekipin, pasi ne nuk i njohim huliganët.

"Shqipëria do të jetë një pasuri për turneun dhe ndoshta do të fitojë edhe simpatinë më të madhe në Gjermani. Në fushë dhe në tribuna. Tifozët janë tepër entuziastë, fanatikë në kuptimin pozitiv, dhe absolutisht paqësor. Fjala “huligan” nuk ekziston as në Shqipëri", tha ish-drejtori i Lazios.

S.DH/Shqiptarja.com

TAG:
• euro 2024
• kombetarja shqiptare
• Pep Guardiola
• Bundesliga
• lazio
• Igli Tare